童心同步

家庭議會推出一輯家庭教育短片，推廣「愛與關懷」的家庭核心價值，提昇家長就孩子成長、培養良好性格方面的知識，以及改善家長處理孩子情緒管理問題的技巧。一連六集名為「童心同步」的短片包括：

第一集：Voice Out!

作為雙職爸媽，忙於工作同照顧小朋友嘅日常起居之餘，有無留返啲時間同小朋友傾吓計，聽吓佢哋嘅心底話，了解吓佢哋嘅內心世界？小柔喺單親家庭長大，媽媽每日為口奔馳，為咗唔好令媽媽擔心，小柔默默承受校園欺凌，唔願意同媽媽或者老師講。最後小柔媽媽係點樣發現同處理呢？如果發現小朋友遇到類似情況，家長們應該點做？聽吓心理治療培訓導師及註冊社工袁嘉華小姐同大家分享。

第二集：「機」不可失大測試

機會嚟到梗係要好好把握，咁手機呢？食飯等位等朋友，你會做啲咩？今集請嚟5組家庭做個實驗，睇吓邊組家庭對電子產品最依賴，又會睇吓父母嘅態度對孩子是否依賴電子產品有咩影響。你又係唔係「機不離手」呢？想解決電子產品成癮問題？想知道兒童使用電子產品嘅時間同管理？就要睇埋片尾瑪麗醫院兒童及青少年精神科主管陳國齡醫生分享嘅小貼士。

第三集：朋友叫過你做最曳嘅事

大家喺學生時期有無做過收藏家？抑或整蠱專家？不如一齊睇吓而家啲學生哥曾經做過最「曳」嘅事係乜吖。 作為家長，知道小朋友做咗啲曳嘅事應該點做？香港有品運動機構總監凌葉麗嬋女士會同大家分享心得，記得睇埋喇！

第四集：我不是別人家的孩子

每個孩子的成長有他的獨特之處，父母不宜將子女與其他孩子比較。香港家庭教育學院總監狄志遠先生會同大家分享他的看法。

第五集：姐妹「同」心

當小朋友淨係諗自己想點，而忽略身邊人嘅感受，久而久之變咗小公主、小王子點算好？片中嘅妹妹成日想搵家姐玩，但家姐忙住準備考試，兩姐妹因此起爭拗。媽媽點樣化解兩姐妹嘅小縫隙？點先可以培養小朋友嘅同理心？快啲去片啦！片尾仲有家庭發展基金總幹事羅乃萱女士嘅分享。

第六集：告別‧哀傷

面對親人離世，哀傷嘅感覺往往難以磨滅 。作為家長，應該點樣同小朋友解釋死亡，一齊緩解失去親人嘅負面情緒？心理治療師李偉堂博士會同大家分享點樣可以幫助小朋友面對及過渡喪失親人嘅情緒轉變。